𠵱家唔少富二、三代都係上市公司董事，廿幾三十歲人已經年薪幾百萬，部份甚至過千萬真係閒過立秋。
好似「殼后」朱李月華位公子朱俊浩，佢年僅29歲，已經係代理「Franck Muller」名錶嘅先施錶行（444）董事總經理，舊年年薪就有300萬元，除開12個月，月薪有25萬元㗎。
先施錶行舊年純利倒退超過50%，最新年報就顯示，朱俊浩舊年加薪19%，年薪300.5萬元，當中包括50萬元花紅。
不過相對其他富二、三代，朱俊浩嘅年薪當然好一般。好似33歲華置（127）主席劉鳴煒，月薪就有150萬元，未計花紅，年薪1,800萬元。彤叔長孫、現年34歲嘅新世界發展（017）聯席總經理鄭志剛，舊年年薪1,390萬元，即平均每月116萬元。