大摩馬房嘅「步步友」雖然落選上季最佳一哩馬獎項，但佢嘅中距離實力，仍公認係全港最強，甚至可能係全球最佳一哩馬之一，佢喺香港八戰得五冠三亞一季，原來只有四匹馬曾比佢先過終點，包括馬王「威爾頓」，喺香港經典盃及打吡都跑贏「步步友」；而冠軍一哩賽一役，擊敗「步步友」嘅「繽紛會」，乃現時世界馬匹排名榜排第二嘅勁旅，「步步友」可以話雖敗不辱。
其餘兩匹贏過「步步友」嘅馬，又係邊隻呢？原來係上季初二班1400米頭二馬「得盛」、「智高星」，嗰場「步步友」就得季軍。「得盛」之後喺港澳盃同澳港盃都上名，家陣假假哋都104分。而作為四匹曾勝「步步友」嘅其中一駒，「智高星」目前只74 分，預計總編班後將更低，可以話着數到暈。
「智高星」上季未贏過，但咪以為佢已經冇進步或走下坡，睇番佢上季15戰，其中13次係10倍以上嘅冷門，部份更冷至99倍，蠱蠱惑惑根本無心戀戰博減分。今季機坪重開後，佢一連兩日都有露面出操，咁早復課擺明健康良好，上季嘅劣績相信只係假像，新一季「智高星」只不過六歲，本身又減分成功，真係大把世界！