唔少傳媒噚日引述一份竊取他人電腦所得嘅資料，大爆壹傳媒老闆黎智英慷慨捐款畀泛民之時，亦話肥佬黎同佢太太、李柱銘伉儷、東亞銀行主席李國寶、陳方安生以及美國前駐港澳總領事楊甦棣夫婦等一行八人喺今年初見過面。楊甦棣為乜來華？陳太噚日笑住話，佢查實係要去澳門捧The Rolling Stones場。
八方翻查資料，發現The Rolling Stones今年3月初喺澳門威尼斯人金光綜藝館舉行演唱會，票價最平580蚊，最貴嘅VVIP座票索價14,880蚊。唔知楊甦棣係咪買咗靚飛吖，但肯定佢食過好嘢。事關佢哋呢班紳士淑女敍舊當日去咗林建岳有份投資、位於中環歷山大廈嘅著名意大利餐館8 1/2 Otto e Mezzo BOMBANA開餐，由李國寶埋單。