每年公開試放榜之後，報紙梗係將注意力集中於狀元級人馬，細數邊間學校盛產狀元，狀元要讀邊間大學，希望主修乜科等等。呢啲問題嘅答案幾易寫定，因為幾乎人人都要入讀港大醫科、港大法律、中大或科大環球商業三大類。今年就略有不同：（一）狀元皆出自傳統大名校（只有一間名氣稍遜），前兩年就有地區名校學生上榜，（二）狀元唔係一窩蜂去晒醫科、法律，居然有學生要入中大中文系/政政系，港大英文系，少見也。相信係文科生考到狀元級成績啩。其餘九位有五位要讀醫科，兩位讀港大法律，一位讀科大環球商業，一位讀劍橋經濟，選科合乎預期。
聖保羅男女中學成績最好，不止DSE出了三個狀元，IB試14位狀元（即考獲45分滿分）之中，8個來自英基，聖保羅男女23位IB畢業生之中，亦佔一位，還有7人考42分或以上，與專攻IB、考生眾多嘅英基學校比較，毫不遜色。
過往未見過考試狀元話要讀中文系嘅，聖保羅男女嘅黃蕊獻女同學竟以中大中文系為目標，引起左丁山好奇心，搵啲線路打聽吓點解會咁呀？聖保羅男女校友任職中大高層者，為數不少，例如新亞書院院長黃乃正，敬文書院院長楊綱凱，中大副校長張妙清，前中大校長李國章及劉遵義，前中大中國文化研究所所長陳方正等等猛人，可以講話中大多得Co-Ed唔少貢獻！打幾個電話之後，卒之有探子回報，呢位黃同學嘅中文科老師姓林，係中大中文系校友，屬逸夫書院，在呢位林Sir教導之下，男女校學生嘅中文科DSE成績，可以用個「好」字嚟形容，另外一位狀元黃浩維（要讀港大法律系）亦係林Sir學生。
香港太多叻仔叻女要讀法律、醫科、環球商業咯，今年有人要讀中文系、英文系，總算耳目一新，希望能開吓風氣，令明年嘅狀元有更多學科選擇。
狀元畢竟係極少數，考得七科共20分或以下者先至係多數主流。去年有世姪考得21分，認為係意外錯失，係要重讀，左丁山已經勸佢唔好，因為過往統計數字顯示，重讀生唔會有任何優勢，重讀係浪費時間啫。世姪不服，佢嘅學校（大名校嚟㗎）又肯收番佢，咪試吓囉。今年成績出嚟嘞，得20分，服未，左丁山勸佢去美國讀社區學院，或者可以打開另一條新路呢！