Tempo最出名就係sell夠堅韌，估唔到被佢收購咗嘅維達（3331）最近有樣學樣，喺內地搞咗個marketing活動，用紙巾去做婚紗，搵埋模特兒試穿，喺多個城市行貓步做宣傳。噚日維達業績記者會，管理層就特登展出一條由維達紙巾造成嘅童裝版公主裙，遠睇幾可亂真。
究竟條裙係咪真係着得㗎呢？如果着住流汗，會唔會透晒，甚至爛晒呢？維達主席李朝旺面對在場記者好奇提問，居然拍心口話肯定冇問題，揚言用維達紙巾去撈金魚，都唔會爛，何況只係區區流汗？肯定無事！
華華見狀，即場建議李主席，明年可以整番套紙巾裇衫或者紙巾西裝出來，由李主席真人穿上示範，咁就認真有說服力喇。李朝旺笑住話會考慮呢個建議，但就驚自己身材唔好，所以都係會請模特兒試穿畀大家睇。