七月十四日中學文憑試放榜，七月七日IB試放榜，七月八日升中放榜，學校放暑假前，學校、學生、家長忙個不了，放榜之後，當然係有人歡喜有人愁，最愁嘅會係本地學校。先講升中，今年只得四萬八千名小學生升中，人頭少過中一學額，各校只驚收生不足，那敢將學生拒諸門外？結果有91%升中生獲派頭三個志願，比率創14年新高，故此到處都見小六生與家長歡天喜地，仲有誇張情況發生，獲派九龍華仁嘅學生話要試吓向皇仁叩門，獲派沙田官中嘅想話試向沙田呂明才、曾肇添叩門，顯見係人心不足。唉吔，全港中一剩餘學額預料多達4,500個，中學面臨縮班威脅，老師面臨失業或就業不足威脅，唔驚就假。
六年後怕連大學都驚埋，今年有近八萬人考文憑試，得二萬六千多日校生考到所謂3322最低入大學資格，比率約32.5%，而資助大學學位約係15,000個。文憑試成績不拉線（拉curve），六年後如比率維持在33%，有資格入大學嘅中學生大概係16,000名，入大學話咁易，大學冇得揀，水準自然下降，而所有啲副學士、私立院校更要被逼收錄啲「肥佬生」，問你暈未？所以話，香港大專院校唔向內地招生，等自殺咩。
香港好多中學面臨派位危機，一生不能少，老師都要效法銀行職員推銷信用咭，出街派傳單，上一輩老師大概覺得有失斯文，但為了飯碗，無奈他何。近年時興讀IB，不少家長甚至唔稀罕升中派位，直情送學生入國際學校（又係打崩頭，更難入），入直資讀IB課程，以求逃避DSE嘅課程及中文科。香港學生考IB，成績又係標青喎，全球13.55萬名考生之中，亞太區佔1.4萬名，香港有1,900人，全球IB試平均得分係29.81，亞太區係32.76，香港就高到35.21，零舍領先，且有14人考獲45分滿分（英基佔咗8個），佔全球146名滿分狀元嘅9.6%，直情威震全球啦。香港IB教育成績之好，嚇親外國人，所以順帶本地生之DSE成績，已獲國際迅速認可，著名大學爭相承認。呢日碰到由唐君毅先生、孫國棟先生及一班老新亞校友創辦嘅新亞中學嘅黃惠庭校長，順口問佢呢間堅持中文教學嘅中中，DSE成績如何？佢好開心咁話成績唔錯，最好嘅學生考到中文、數學兩科5**，英文、通識、化學、中史四科都係5*，中中學生考到英文5*幾令左丁山意外，呢啲成績最好申請讀繙系或新聞系啦，成個社會科學院都啱。