古巨基同得力助手Lorraine拍拖廿年，終於喺今個月12號，由基仔悉心安排驚喜婚禮拉埋天窗，基仔噚日同連詩雅（Shiga）、方皓玟及林欣彤出席商台停車場舉行拉闊音樂會記招時，就透露為咗紀念結婚，嚟緊新碟會有首送畀太太嘅歌，佢仲會搵個特別夜晚先播畀佢聽，而今次拉闊都會揀首歌送畀太太。
「生活冇改變」
連日嚟喺街上都收到唔少人恭賀，問基仔習慣叫太太未？佢話：「都係叫佢Lorraine同陳小姐，生活冇乜改變，只係身份唔同咗，手上多咗隻戒指。」基仔希望明年可以放假同太太補度蜜月。
首次參與拉闊嘅Shiga，問佢男友會否捧場？佢話：「我冇男友，會叫晒身邊朋友嚟捧場，睇吓佢得唔得閒，嗰次俾人影到後，我都怕會嚇驚佢，始終佢都唔係圈中人。」近日Shiga工作較忙，所以兩人都係以短訊聯絡為主，未有再約出街。
撰文：馮仁昭