大新銀行（2356）同CEC國際（759）旗下阿信屋合作宣傳，用大新卡簽滿1,200蚊，可以喺阿信屋用1蚊雞換指定零食。睇番佢最貴嗰件貨係魚肉腸賣20.8元，計埋1,200蚊簽賬額，即係九八折優惠，呢啲小恩小惠，似乎只吸引到精打細算嘅師奶。
做零售嘅呻舖租貴，做銀行又呻監管嚴，華華都明白做生意太多優惠好難維皮，但睇番呢個優惠，簽夠1,200蚊，先至可以用1蚊換一份零食，想用優惠價換第2份就要再多1,200簽賬額，而阿信屋嗰6件指定貨品，售價介乎14至20.8蚊，值唔值得簽1,200蚊去換，應該唔使諗好耐都心中有數喇。
睇番其他信用卡，中銀（2388）卡之前都有類似優惠，簽夠3次600蚊以上，可以用1蚊換9片裝嘅Godiva朱古力一盒，以佢原價125蚊計，都叫有九四折優惠。