有兩種人的說話不可信，一是闊佬，二是差佬。而做了政協的闊佬，忽然引述差佬說，指中區差館忙於反佔中，人手緊絀，巡邏次數驟減，豪宅被爆竊的機會高過以前。
言者有心，聽者有耳，高牆之下，必有笨蛋。城中闊佬，在良心驅使下，反覆思考，連自己的話也未必信得過，但冇理由唔信政協和警隊一哥這種唔知良心有幾危險的社會權威。闊佬們，於是展開自己財產自己救的大計。大計抄政改五部曲，第一部，是僱用更多保鏢。保鏢不屬優才，不能從內地輸入，再說，闊佬信唔過省港奇兵。是以，馬上跳去第二部，搵梁美芬扯旗，組織第一支保八（發）志願軍！但愛國志願軍來來去去是「反中央、撐張融」那種貨色，蠢到阿媽都唔認得！唯有像飛行棋，即時skip了第三部，直入第四部曲，向駐港部隊埋手。趁近日添馬艦有人事調動，闊佬透過西環，邀軍哥過檔，話之你中環癱瘓，闊佬有軍車開路，豪宅變身A貨軍營，好打得！
公民廣場搞圍板？住在加列山道的闊佬冷笑兩聲，開了一張二百萬的支票，給小三買包包。