老虎活士克服傷患復出後參加嘅第1個大滿貫比賽，成績唔好其實好正常，不過衰就衰在佢係14項大滿貫得主，加上喺賽前又誇口話目標要贏冠軍，點知自己又唔爭氣，喺英國公開賽最後1日比賽，打出高標3桿嘅75桿，4日成績總計只係造出294桿排第69名！正所謂一沉百踩，佢𠵱家仲可能連9月嘅萊德盃都冇份玩！
今屆萊德盃9月就打，美國代表隊隊長屈臣喺周日就話：「全世界都覺得我會自動波揀活士入隊，但事實唔係咁囉！」佢仲話，喺呢個比賽好明顯睇得出活士未操得起狀態，仲挑機問記者：「佢今日打成點？係咪低標？」
事實上，美國隊的確有大把人揀嘅。例如後起之秀科拿，今屆喺標準桿為72桿嘅英國公開賽球場上，4輪比賽都打出6字頭嘅桿數，仲穩定過捧盃嘅麥艾萊㖭，最終佢只可以同西班牙嘅加西亞一齊攞亞軍，真係有啲唔抵。