4月25號主打嘅泛海酒店（292），最高見本月4號1.35元，貼近翻半番，大折讓股一樣掂。揸咗泛店70%嘅泛海集團（129），現價係NAV一折幾有售，仲抵搞。
靚地在手潛力大
泛海連埋酒店資產重估，NAV上到14.9元，現價（2.07元）係大幅折讓86%，或0.14倍PB。阿仔泛店經呢期上升，PB收窄約莫0.2倍。又呢期見，同樣係大折讓本地薑，隻隻生猛，富豪國際（078）3月25號到家陣，累升咗32%，又快創一年新高。德祥地產（199）5月尾起步，家陣累升近30%，創埋三年新高，而德祥企業（372）亦升咗18%。
呢三隻股PB，已經收窄到0.27倍至0.39倍不等。咪以為泛海PB，唔係同佢哋距離好遠，冇料到。計計數，泛海PB，收窄到0.39倍，已經講緊要升1.8倍到5蚊！
喺泛海資產裏面，包括咗總數高達49億元嘅財務資產。當中，應該有近14億元，係歐、美同香江證券。呢期環球股市當旺，尤其美指，再創新高，泛海投資高高手，NAV已經有得再增值。而呢批資產，全部列為流動資產，單係計上邊49億元市值，泛海每股潛在變現，高達3.9元，係現價1.9倍！
泛海主打香港物業發展項目，一個位處元朗洪水橋總樓面52萬平方呎土儲，呢笪地正正喺港深西部鐵路線出口，連接住深圳前海經濟區。另一個就喺渣甸山白建時道豪宅項目。兩個項目，位處靚仔地段，相信一推售，賣個滿堂紅，又係另一個大增值元素。
冷灶煲泛海，PB輕輕收窄到同泛店一樣，都要見2.98元，幾乎要翻半番；博上富豪0.39倍PB，升1.8倍，悶聲大發財。
錢雋
細價股專家
本欄逢周二、三、五刊出