上月因世界盃，被「三色台」屈咗$444裝3個月。豈料有意外收穫：發現兒童台在重播足球小將！重溫30年前看的舊作，我很激動，先是大量兒時回憶：林源三、小志強、麥泰萊還有三杉淳……還記得當年看着盧比度竟在戴志偉（圖）贏得冠軍後放佢飛機，違背帶他到巴西的承諾，我一面鬧一面喊，由430穿梭機喊到六點半新聞，嫲嫲問我做乜？我一直咬牙切齒重覆：「點解唔帶佢去巴西？」成人們，應承咗小朋友嘅嘢咪做唔到！
30年後，最觸動的已非盧比度放飛機那幕，竟是小學大賽之初，一段可能無人記得的段落：林源三受傷，森崎被迫成正選門將，卻被樑仔等人睇死。可憐的森崎求志偉訓練他，一輪苦練後，終於通過隊友勁射100球考驗，獲得認同。雖然森崎最後都係紙板，專負責連人帶波被射入網；但這段奮鬥的毅力、志偉對朋友的承擔，就是高橋陽一在整個「足球小將」中的哲學；還有每逢比賽，落敗一方總會落淚，取勝的志偉總會給予鼓勵，最後化敵為友……單純的熱愛足球、朋友、以至生命。80年代的動畫，就是以如此正面的價值觀伴我成長。
如今，我已沒時間看動畫，但偶爾看到的，總是主角帶着神獸、寵物在虛擬背景與人對戰，似在引人買玩具商品，多於一套真正有靈魂的故事。唉！可能孩子日後會對我說：「仲足球小將？咁老土㗎！」
方柏翹
now足球評述員