康宏（1019）主席王利民為獎勵一班同事，早前飛咗去巴西睇世界盃，可惜遇上不快事，一行17人，其中4人竟然攞住假門票，冇得入場睇荷蘭對阿根廷。佢哋噚日已經同幫佢哋安排行程兼買世界盃門票嘅太古旅遊達成和解協議，雙方簽埋保密協議，唔可以透露詳情，王利民形容方案係可以接受嘅。
不過咁，大家永遠唔知前面有乜事會發生。據了解，王利民一團人睇完波就飛去亞馬遜森林繼續行程，去到遇上一團強國人旅行團，當中有兩人話有兩張總決賽門票出讓，開價每張5,000美元（3.9萬元）一張，王利民決定買畀兩位攞咗假飛嘅同事，仲即刻安排飛機票，飛兩位去里約熱內盧嘅球場睇波，兩位同事最終可以睇到德國對阿根廷爭冠軍。