早兩日出席婚宴時有位朋友一見面就狂呻，話2月底有跟菲菲買舜宇光學（2382），當時只係6.8元左右，點知去到9蚊邊忍唔住沽咗。睇怕呢位朋友見到噚日舜宇受惠上月銷售數據靚，電話相機模組出貨量按年升逾六成，令股價再創新高，亦較推介時升六成，應該唔太多開心。但炒股票最緊要練得豁達啲，賣仔莫摸頭，與其望住幅圖呻「好慘呀，早沽咗」，信佢係得嘅，不如吼準時機炒多轉。
早前有強國土豪用2.8億港銀拍得明成化雞缸盃去吸仙氣。而家中國人有錢啦，越來越多人講究文化藝術，你睇吓馬雲都走去入股文化中國（1060），仲搵埋王家衛、陳可辛、九把刀開戲。
噚日《中國日報網》報道，美麗中國（706）入股成1億人仔落大導演張藝謀旗下公司。美麗中國6月公佈投資昆明滇池西岸項目，將會成為張大導出名係搖錢樹嘅「印象系列」實景演出之最新取景地，名堂係《印象．滇池》。仲會利用「印象」品牌，打造相關概念文化休閒度假區，實行長搵長有。唔知呢單嘢有幾堅，但就算單嘢係吹水，美麗中國本身做嘅生態環境建設業務本身已係政府支持業務，文化產業亦食正時勢。公司早前以0.4元配股，跌到去0.35元似有承接。現價仲平過配股價，如果單嘢係流，最多穿咗0.35元止蝕；但如果係堅，就可大炒特炒，絕對有值博率。
Fifi
http://www.facebook.com/lovefrystock
本欄逢周二、四刊出