Tempo的母公司愛生雅（SCA）去年正式入主維達（3331），其後維達委任投行研究雙方的業務合作。當時大家已心中有數，SCA遲早會把其中、港業務注入維達當中，長遠利用維達呢個vehicle，去發展內地個人護理用品市場。這就解釋為何維達最近大半年業績欠佳，估值又偏高，但股價仍相當硬淨。呢個「Tempo概念」，其實早在一年多前、SCA高價接主席批舊股開始，已經price in緊了。
是次維達宣佈以11.44億元、買入SCA中港業務，交易主要可分為兩部份。首先是香港業務，以賣Tempo為主，舊年做約3億元生意，賺逾2,300萬元。另一部份是中國業務，呢一part主要賣尿片為多，品牌有「噓噓樂」和「包大人」。但分析員形容，SCA的中國業務近年表現相當疲弱，唔好睇Tempo在香港好勁，喺內地其市佔率其實是10大不入。維達是次收購SCA中國時，沒有採用一般用市盈率的估值方法，反而選擇只買入公司嘅銷售合同和存貨，即係連SCA中國原本的員工都無接受。某程度上反映，SCA喺中國真係幾唔掂。
維達由一隻幾乎純紙巾股，轉做如恒安（1044）咁，做埋其他個人護理用品，方向是正確。但對業績來說是否有大幫助？這將很視乎公司未來會如何去整合、以提升SCA中國的效益。但無論如何，這都不會是短期可實現的事情，而原本行業供過於求、競爭過大等問題，仍會繼續困擾紙巾股的表現。
海迪