究竟係之鋒「未夠秤」，定係有啲人嫌自己「未夠癲」？外號元秋嘅民建聯立法會議員蔣麗芸，前日喺《城市論壇》討論公民提名時，亂吹公民唔等於係永久居民，連主持謝志峰都忍唔住出口話佢：「相信有正常頭腦嘅人都知（公民提名）講緊三粒星嘅人啦。」
建議政府搞暑期洗腦班
元秋頭腦可能勝於常人，佢噚日仍然對公民身份、未夠秤等議題咬住唔放，喺出席立法會政制事務委員會時，向好打得嘅政務司司長林鄭月娥提問，話有好多小朋友分唔清「公民」同永久居民嘅分別，話啲小朋友嘅腦袋，仲係圍繞「我係公民點解唔投得」。元秋仲向林鄭建議，政府應該搞啲暑期班，畀有興趣嘅小朋友參加，集中帶出政改過急對香港發展未必有好處嘅道理咁話。
哦！元秋前日咪講過政改係講緊香港前途問題，「我哋可以有個外國人（她指鄭宇碩持外國護照），仲有個唔夠秤嘅小朋友（黃之鋒）喺度，咁點討論呢？」咁唔知點解，一日之後，佢又要逼政府向「未夠秤」嘅小朋友洗腦呢？
其實元秋喺開會之前，已經喺facebook發炮，話自己喺城壇話之鋒「唔夠秤」，其實呢三個字唔係出自佢手筆，而係源自於陳日君同黃之鋒兩人吹水之作。佢仲話公民提名國家之中，之鋒提及冰島，但冰島係屬於「半總統制」，「差點忘記冰島是全球第一個破產國家！很多市民的社會福利，退休金一夜之間差不多冇晒！」哦，原來睇問題，係可以有咁多種角度。
李八方
mailto:[email protected]