今年係人類登陸月球45周年，國家航天局同民政事務局噚日就喺科學館舉行咗個「中國探月工程展」，展示中國近年探月工程同航天科技發展。呢個同月球有關嘅活動，就請咗個名有個月字嘅政務司司長林鄭月娥主持開幕儀式。好打得嘅林鄭，喺致辭時都搞吓gag，話自己個名叫「月娥」，獲邀出席呢個展覽，覺得「特別有親切感」咁話。叫得做月娥，唔知遲吓中秋佳節，佢會唔會為咗逃避狼英暴政，走去奔月呢？講番個展覽，展出嫦娥一至三號繞月人造衞星嘅機械設備模型、玉兔號月球車模型同多幅喺太空拍攝嘅月面圖片，即日起至下月24日舉係科學館舉行。