國際標準對於孫柏文有如愛國愛港，非常有啟發性。我哋有好多愛國愛港立法會代表支持嘅嘢，都引入外國勢力去達致國際標準，例如落實競爭法嘅政府喺澳洲搵番嚟嘅人。橫掂一不做二不憂，我建議應該由澳洲召專家來港落實政策，令香港呢條落後嘅小漁村能達國際碳排標準。
燒任何嘢，都會有二氧化碳排放，連你我身體燃燒食物時都會，我哋燒時就係叫呼吸。當年，我覺得前特首曾蔭權最KO啲「飯民」嘅一刻，就係有關碳排放。有次喺立法會答問大會，湯家驊從佢長居奧林匹斯山上嘅道德高地，殺聲震天咁衝來凡間問：「全球都關注碳排放，政府有乜政策？」曾特首聽完，就翻開文件夾，睇一睇答：「香港人均碳排放只係英國嘅六成。Next！」勁！即係冇政策都已經係人哋嘅學習目標。
抽稅打殘多個行業
如果係湯家驊定政策會點？當然學國際標準定個碳排稅，燃燒油、炭、天然氣等都要抽稅。港燈（2638）、中電（002）等先要加電費，抽水議員唔畀加。唔加就唔會減用電減排放，不過抽水議員、綠色和平唔會理。之後就係香港用最多石油嘅公司國泰航空（293）中招啦！香港要減排，只要通過數字遊戲就得，例如輸入電同將飛機升降外判澳門、深圳機場就得。
點解今日我話我哋要學澳洲？因為人哋人均碳排放係香港三倍，喺幾年前開始抽碳排稅。非常成功將好多工業、農業、運輸業、發電等打殘，勁減碳排放。點知，喺上次佢哋冇篩選嘅普選下，選咗個話到明會取消碳排稅嘅保守黨政府，亦喺上周履行競選承諾，取消碳排稅。選舉大敗嘅工黨同綠黨就大力批評取消碳排稅。
睇番香港，最驚引入澳洲標準嘅最大阻力來自李卓人嘅工黨。最諷刺嘅地方，就係天下工黨一樣黑，一樣咁鄙視戴卓爾夫人，佢當年決定結束對冇效率煤礦嘅補貼，令碳礦工失業。原來戴卓爾就唔得，工黨們用碳排稅打碳礦工就天經地義。
孫柏文
獨立股評人
http://facebook.com/shuen
本欄逢周二刊出