前全國政協委員劉夢熊（圖右）冇帶身份證都可以簽名，力撐周融做發言人嘅保普選反佔中，周融噚日回應話，當日已經前來街站嘅劉夢熊因為冇帶身份證嚟簽名，已作廢佢嘅簽名，又指佢嘅簽名上係冇獲聯盟蓋印同核實，只係當時應記者，放喺箱旁影相：「唔知佢跣手定係乜嘢，放咗落去。」周融指已將劉嘅簽名攞番出來，工作人員提醒佢下次要帶身份證先至可以簽名。
周融：叫我薑蓉冇所謂
佢又指，行政會議成員李慧琼亦都一樣，當日佢冇帶身份證，指自己因為泊車之後，將手袋連身份證放咗喺車中，所以義工同佢講「對唔住，你要有身份證」。李慧琼之後攞番身份證再去簽名，先至獲接受，「行會成員我哋都咁對待，點解大家仲要質疑義工去做數」。
早前有市民參與工聯會反佔中遊行時，稱「支持張融，反中央」，被叫錯名嘅周融話唔緊要：「你叫我做周融，叫我做張融，叫我做薑蓉、蒜蓉，完全冇所謂，我唔需要人哋認識我哋，（認識）我更加唔需要。你話識周融，識張融、識乜融，係冇關係，肯簽名至重要。」