體壇著名「爛命鴛鴦」高球手麥艾萊同網球手禾絲妮雅琪分開咗之後各自各精采，麥艾萊最近搭上愛爾蘭姐仔娜迪雅，而禾琪亦同行家洛比斯傳出緋聞。佢哋拍拖嘅兩年幾就一齊霉足咁耐，點知真係約都冇咁橋，已經分手兩個月嘅佢哋周日就齊齊贏冠軍，認真諷刺。
麥艾萊有模art新歡
曾有傳聞話麥艾萊嫌禾琪黑腳所以想飛佢，雖然嗰時冇分到手，但𠵱家冇咗禾琪，麥艾萊似乎真係即刻行大運。喺英國高球公開賽由頭帶到落尾嘅麥艾萊，到咗最後1日可能有少少緊張，加上有位觀眾係咁扮咳擾亂佢，到咗第16洞佢終於忍唔住向大會投訴，將呢位麻煩友趕出場。不過麥艾萊結果都打出低標準1桿嘅71桿，總成績就係低標17桿嘅271桿，以兩桿之差攞咗個冠軍。
麥艾萊賽後就好激動咁攬住難得到場支持嘅阿媽，仲話要將個冠軍送畀阿媽㖭；但係佢就冇公開多謝盛傳新女友娜迪雅，唔知返去會唔會俾人扭耳仔呢？娜迪雅係愛爾蘭模art，據講佢同麥艾萊舊年透過朋友認識，但一直都收得好密。娜迪雅就懶係曖昧咁話：「我哋兩個係經朋友介紹認識，而我哋經常陪住對方。」講擇偶條件時又話要由朋友做起；講到咁白，仲唔係畀緊暗示麥艾萊？
禾琪喜破錦標荒
麥艾萊周日喺英國利物浦捧盃，佢身在土耳其嘅「前未婚妻」禾琪亦喺大約兩個鐘前贏冠軍。禾琪喺伊斯坦堡網賽決賽，以直落兩盤6:1橫掃意大利對手雲芝，今個球季過咗超過一半後，終於第1次贏到個冠軍，破咗成9個月嘅錦標荒。同咗麥艾萊一齊之後就越打越沉，大滿貫比賽多數都係玩一、兩圈就bye bye嘅禾琪，𠵱家總算冇咁頹喇，世界排名仲升上13㖭。