政總東翼的公民廣場大搞圍板，二百萬納稅人的錢可以點樣使到最盡？
一，在廣場起個超級大公廁，冠名公民公廁，刻意低價外判出去，唔臭唔做，成個廣場冤氣沖天，污染物勁過東涌，陣味深圳都聞到，邊個敢埋去示威？
二，驚死疆獨施襲的功能組別議員，二百萬唔夠請保鏢的，所以，應該響應梁美芬，將公民廣場免費借給志願軍打躉。去邊度招募志願軍呢？盛事基金班老細，實在好橋。民建聯那邊，大把臨記。
三，除了任由C煙絕食和所有煙鏟在公民廣場吞雲吐霧，還可以搞埋公民廣場酒吧，將公民廣場變做coho，酒鬼頂多爆樽，唔會爆政總玻璃嘛。搵林建岳投資吸引自由行，二百萬公帑很快回本。
四，唔使加高圍牆，只消每日朝八晚十，開放給大媽，跳扇舞、唱K曲、跳吓鄭多燕，「反中央撐張融」又得！公民廣場變身愛國大媽俱樂部，對政改一腔熱誠的後生仔，被大媽拉去伴舞，包保熄晒火，腳都軟，癱瘓金鐘！