自從烏拉圭前鋒蘇亞雷斯喺世盃咬完基亞連尼後，俾FIFA禁止參與足球事務，波又唔准掂，連加盟巴塞出席歡迎儀式想踩吓草皮都唔得。就算你唔餓波，又唔再餓到咬人，一班fans掛住你都掛到餓啦！既然10月先有得見，呢班飢渴球迷決定喺佢屋企門口佈下天羅地網，實行生擒阿蘇！
簽名合照「蘇」Nice
話說暫時寄居喺巴塞隆拿、老婆外家嘅阿蘇，日前已經因為唔記得帶鎖匙「摸門釘」，結果俾幾十位粉絲截住。可能見阿蘇上次影相、簽名有求必應，上周五又有十幾位粉絲有樣學樣，喺佢屋企門口守候；結果真係等到踢住拖嘅阿蘇同老婆蘇菲婭散完步返歸，一班粉絲隨即蜂擁而上，圍住佢之餘仲捉實隻手。之前阿蘇施咬功就俾人叫「喪屍蘇」，𠵱家睇張相，似係阿蘇俾班喪屍扯實唔放就真。
安歷基友賽響頭炮
睇嚟阿蘇只會喺球場內發癲，場外嘅佢同以往一樣咁好人。有球迷離奇遞件美斯嘅巴塞10號波衫攞簽名，佢照簽唔嬲；啱啱捉實阿蘇隻手嗰位女球迷上前想抱抱，佢都好gentle咁搭吓膊頭，絕對滿足晒fans嘅願望。講番轉頭，差啲冇留意阿蘇身上件衫，之前因為咬人嚇走咗唔少贊助商，今次係咁意出街都識着番件「三間」T裇，果然識做。不過，FIFA個禁令去到10月先完，阿蘇往後出街都要諗定計仔點樣應付熱情球迷嘞。
講番巴塞，西甲要到8月尾先開波，佢哋周日就同西乙維爾瓦踢友賽，都係以試陣為主。新帥安歷基首次督師，派晒B隊主力加幾位新兵，好似達史特根、夏利洛域同外借收番嘅迪路菲奧等上陣，最終小勝1:0；戰情唔算精采，最搶鏡嘅反而係全身着晒隊衫嘅安歷基，短衫短褲加滄桑鬍鬚，都幾有「型佬」味道㗎。