【本報訊】民怨沸騰下，逾51萬人7.1上街，前政務司司長唐英年昨也指當日「好多人上街」，連他的朋友也有參與遊行，呼籲政府多與市民溝通。他又批評近日政府總部加設圍板「話起就起」，只會令市民懷疑政府，最終或會「翻牆」，令雙方更形對立。
唐英年昨日指出，從傳媒和朋友的口中得知，今年參與7.1大遊行的人數極多：「我7月1日唔喺香港，我睇到傳媒普遍報道，知道有好多人上街，龍頭去到終點，龍尾尚未離開維園，我亦都識得有人參加遊行，話比起去年多咗好多好多人。」
促梁多聆聽市民聲音
2003年出任工商及科技局長的唐英年憶述，當年7.1大遊行也有幾十萬上街：「當時我係政府嘅一員，自己都感到好焦慮。」結果前特首董建華在遊行一年半後「腳痛」下台。
唐英年昨日不評論梁振英的去留，但認為梁振英的任期為五年，對其工作有期望，希望梁施政時能夠做好政策研究，直指中產和年輕人對將來感到焦慮：「佢（梁）要更多聆聽市民聲音，制訂政策（須）更多透明度同向市民交代佢嘅政策。」
被問到政府總部被圍板包圍，唐認為，即使理解政府要防衞有市民衝入政總而加設圍板，但作為一個開放型政府，應及早向市民交代：「如果政府因為保安原因而咁做，我認為佢應該早一啲解釋點解要咁做……如果你唔溝通，話起就起，就變咗今日咁，大家對佢（梁）起這道牆，係好有懷疑。」