現年33歲嘅前英格蘭國腳中堅泰利雖然只係同車路士續約1年，但周薪都有15萬鎊，另加出場費，所以佢仲可以生活得好豪。喺新一季英超開波前斥資375,000鎊，買咗一架最新款Rolls-Royce Wraith，同埋一架土豪金特別版Range Rover Overfinch 4x4（圖），佢仲俾人影到着拖鞋揸勞斯萊斯㖭。另外，上周六佢喺季前熱身賽，下半場後備登場入兩粒，幫車仔反勝英乙球隊AFC溫布頓3:2。今場另一個焦點係AFC溫布頓嘅「肥豬王」艾堅費華（小圖右），呢位身高1米80嘅32歲前鋒由於有超過220磅咁重，所以被認為係當今球壇最大隻嘅球員。場波佢踢咗66分鐘，雖則冇入波，但龐大嘅身軀就為車仔後防帶來唔少麻煩，連對慣世界級前鋒嘅泰利都差啲搞佢唔掂。與此同時，車仔主帥摩連奴俾陣中嘅22歲埃及中場穆罕默德沙拿搞到頭都大埋，事關沙拿有可能要返埃及服1至3年兵役。由於車仔話明呢個夏天唔再買人，若然沙拿真係要返埃及，摩佬可能唔係好夠人用，你話唔煩就假。