新一期馬會雙月刊《駿步人生》今日出版，封面人物係啱啱卸任港大校長嘅徐立之，相中可見卸任後嘅徐立之精神飽滿，原來佢榮升做阿爺，居於加拿大嘅孫仔啱啱滿月，難怪人逢喜事精神爽。徐立之喺訪問中話，以前做校長，總有同事幫佢打點一切，𠵱家要自己每日計劃行程，仲要諗吓搭車定揸車方便，今時唔同往日啦。
最近佢擔任珠海學院校董，原來係報恩，事關當年去外國讀書唔夠盤川，係靠喺珠海教書搵番啲水腳費，佢亦答應咗家鄉嘅浙江大學，協助該校研究工作，但表明唔會做官。講到年輕一代鍾意挑戰權威，徐立之話冇問題，但最重要係唔好空喊口號就算數。