今屆書展俾人話入場費「大細超」，點解本地人要畀足全費25蚊入場，自由行或者拎外國護照遊客就可以用優惠價10蚊入場，貿發局回應話咁做目的係想書展國際化。究竟貿發局點樣靠向遊客收少啲錢，將書展衝出香港，留返畀當局慢慢計。美國有經濟學家將現實生活遇到嘅怪誕理論，結集成書，醒吓大家「怪雞」搵錢方法。
美國芝加哥大學經濟學院終身教授Steven D. Levitt同記者Stephen J. Dubner推出嘅《Freakonomics》同《Super Freakonomics》，淨係聽嗰書名都覺得好怪雞，今次再乘勝追擊推出《Think like a Freak》。今次本書冇之前兩本咁，解釋自殺、犯罪同墮胎嘅社會現象，反而借社會中嘅奇怪論點，幫大家點樣搵多啲。
本書提到嘅野並非隨口噏，舉出現實生活事例深入淺出，仲有大量數據支持，由生活另一個角度出發，包括盡情拋開「道德觀念」，唔好俾個框框困住自己，從而睇穿商業社會背後嘅大道理。
舉例如美國亞特蘭大想搞好奧運會，政客就會同大家玩「數字遊戲」。譬如犯罪率，以犯罪率持續下降，務求令外界信服當地係一個合適舉辦大型活動嘅地方。不過，執法當局想要更多資金，犯罪率就會被表述成為逐步上升，以獲得更多資助。姑勿論書裏面有幾多可以應用，但至少睇咗兩位經濟學家講嘅得意理論，總算有錢落袋。
C+B
本欄逢周一刊出