「蘋果日報」報導長江實業推出之大埔鳳園嵐山一期有超細單位，實用面積只有177平方呎，相等於一間「劏房」，或稱為「劏樓」，新聞就夠轟動嘞，但細小住宅單位如果係一個人住嘅話，並無嚇人之處，反正香港地買賣樓宇，純屬你情我願，冇人揸住支槍要你買177平方呎單位嘅啫，只要賣方提供足夠資料，全無隱瞞，興建及銷售超細單位，只係迎合市場需要，市場導向而已，有何不妥？
因超細單位之新聞，引起興趣，特登上網睇吓外地有冇類似住宅，第一次上網搜尋small houses，所得甚少，於是改為搜尋tiny houses。嘩，即刻有好多資料彈出嚟，本以為（根據肥仔K親身經驗）東京先至有時尚tiny apartment，點知美國已有一個Tiny House Blog，介紹不同州分嘅微型房屋。美國咁大、咁多地方，人民都要住超細屋？咪係囉，錢作怪吖嘛，年輕人怎敵得一個「錢字」。雅虎金融網有一篇文章講一位27歲男士買下一間176平方呎嘅獨立屋，裝修度身訂做，發展商包埋樓底起得高啲，加送一層閣仔，售價係二萬五千美元，買家話以後成世人唔駛供樓，唔使太緊張份工，毋須日日算住算住，計錢計生活精神，都係抵到爛，否則嘅話，二萬五千美元都未夠一間正常大小嘅獨立屋嘅首期。經歷過2009年嘅雷曼後遺症，好多年輕美國人都覺得供樓買屋唔係美國夢（American Dream），而係會成為惡夢，可免則免，搵間tiny house居住，唔知幾輕鬆。
左丁山問過地產C，細面積樓宇會否成為主流，佢話好難講，要視乎嵐山銷售嘅反應而定。長實梗係喜歡試吓新概念，在目前細價樓（如第一城395呎單位）受歡迎情況底下，長實嵐山超細樓可能好搶手都唔定，如果屬實，其他發展商就會跟風嘅嘞。
何故政府堅持推出三D辣招壓抑需求，但變成空口講白話，細價樓樓價不斷上升？原因之一就係需求壓唔到，之二係理性預期供應中短期內難以上升，之三就係失業率低，建築費愈來愈貴。地產C話現時之規管成本高，建築費高，令建樓之replacement cost高企不下，持有存貨之發展商斷無割價求售之理（賣咗補唔番），除非好等現金周轉嘅啫。
按：某小型發展商之樓盤起好後，因四棵樹問題，等咗四年先至攞到OP（入伙紙），時間即是利息，此乃規管成本也。