成日話樹大易招風，學民小之鋒早排被人偷拍溫情擔遮相登報，喺台灣又有人全程偷拍「招呼」。噚日之鋒再度應戰《城市論壇》，離開時同幾個學民仔一齊搭的士，發現有架車鬼鬼祟祟喺後面死跟，由維園一路跟到荔枝角，沿途喺車不斷影，就算反拍佢哋都唔罷休，去到荔枝角學民總部附近仍然磨爛席，等足六粒鐘，為乜呢？之鋒話，原來城壇散場後，某周刊中年男記者已表露咗身份，聲稱自己只想影佢哋食飯，之鋒唔想私生活再受干擾，開聲講唔好，點知仲被人跟到過海，一個揸車一個影相，入紅隧仲幾乎並排。夜晚7點幾探子回報，兩位哥哥仔仲未走，之鋒估計好可能跟到佢返屋企為止。