劉嘉玲、梁家輝同謝君豪主演嘅舞台劇《杜老誌》上周五正式喺灣仔演藝學院公演，除咗劉嘉玲老公梁朝偉有到，一向支持本地藝術發展嘅新世界發展（017）第三代話事人鄭志剛都有捧場，佢跟太太余雅穎拍住拖，睇到散場先至走。
聞說鄭太今年3月生咗細女，半年未夠，見佢已經收身成功。可惜鄭志剛話太太怕醜，點都唔肯畀佢出鏡，當晚兩位都係着白色衫，又拖實手，好襯，好sweet㗎。
此外，曾經跟東亞銀行（023）主席李國寶傳緋聞嘅創興銀行家族後人廖碧欣亦跟一名女友人入場睇劇，佢與鄭志剛認識，兩人喺中場休息時碰面都有打招呼。