話說上星期嘅《城市論壇》，有位疑似識輕功嘅隱世「高手」，開場冇耐玩突襲，成功跳上論壇大圓枱，手腳並用咁「表達意見」，嚇窒幾位嘉賓。雖則高手先被警察帶走再放人，施施然行去參加反佔中遊行，但唔代表可以拍吓屁股就走人喎。呢位「高手」噚日都有現身論壇，不過保安唔俾入，惟有喺場外喪鬧主持謝志峰。八方收到風，原來被踩嗰張枱價值成一萬蚊，事後發現被高手踩爛咗，𠵱家身處北角警署做證物，噚日論壇出鏡嗰張係新枱嚟㗎。據聞阿高手好大機會被人控告刑事毀壞。唔怪得有人成日話佔中冇可能和平，原來有啲人係以小人之心，度君子之腹。