面對梁振英嘅五年任期，港人只係捱咗兩年，長路漫漫，惟有寄情下屆邊個參選令自己開心啲，前政務司司長唐英年同佢嘅「殿堂級」支持者、前金管局總裁任志剛噚日就互撐對方選下屆特首。兩人係咪吹水得啖笑唔重要，重點係反映兩人都唔想狼英冧莊囉。
合作無間鏈贈唐家
任總噚日喺書展為佢嘅新書《居安思危》主持講座，唐唐同唐太都有嚟捧場。任總話，唐唐既係自己嘅前老闆兼老友，仲叫在場嘅市民下一屆選唐唐做特首。（吓？乜政改方案通過咗咩？）佢仲講到明，若果下屆有個姓唐嘅人出嚟參選，佢會再幫手。
但N次講過唔再選嘅唐唐，反客為主，話希望任總出山選特首，感謝對方以往咁支持佢，雖然稱兄道弟，但唐唐好無情咁以「我冇興趣選下一屆」回敬任總。近年鍾意「鬥木」嘅任總，親手送咗條叫做「合作無間（endless chain）」嘅原木鏈畀撐場嘅唐唐，寓意大家合作無縫，唐太郭妤淺畀面即時戴上（小圖）。
被問到「齊昕嘅母親」梁太早前令人咋舌嘅表現，有冇影響香港嘅「第一家庭」形象，唐唐話，市民已有自己嘅意見，希望大家畀多啲空間予梁氏一家，又話每個家庭都有佢哋自己嘅挑戰，父母子女最重要係溝通咁話。
至於唐太郭妤淺，佢噚日除咗同八方互相問好外，其餘話不多。佢全程拖實唐唐做跟得夫人，V領背心連身短裙，臉上掛住一對「腰豆眼」。
李八方
mailto:[email protected]