內地明星殺入財經界消息一單接一單，除咗電影公司搞上市造就趙薇、陳凱歌、范冰冰等一班導演、藝人變身上市公司股東之外，主動合組投資基金嘅例子都有。內地著名演員李冰冰、黃曉明同任泉近日就公佈推出Star VC嘅風險投資計劃，三日就吸引過千間企業邀請佢哋投資，羨慕死一班投行同基金界嘅真正財經人。
Star VC第一期資金規模大概8,000萬元人仔，預計一年投資10個項目，仲唔排除投資IPO。據講今次投資計劃搞手係今年39歲、曾經喺《少年包青天》入面演公孫策嘅任泉，作為總經理，佢主要負責執行工作，至於CEO黃曉明就出主意，李冰冰就係代言人，三個人股權比例平分。
曾經入讀過長江商學院嘅任泉透露，消息公佈後4個鐘，就收到超過300間企業來信，累積三日就有成千間畀佢哋篩選，乜都未做就有咁多項目送上門，難怪好多係投行同基金界工作、本來只當佢係演員嘅同學仔，𠵱家都掉轉頭怕佢哋會搶飯碗。