好友Brenda最近癲狂地換手袋，每次買完新袋還要post相上網。我不禁問：「有錢冇碇使，被人包呀？」Brenda翻白眼：「我都想搵契爺包養，包包全係二手貨。」原來她不滿前上司經常在facebook晒手袋，「她擺明針對我。」點解呢？「因為我升職坐咗佢個位，佢就成日喺facebook單打我，又放手袋相嚟嘲笑我搵錢少過佢。」
我冇笑Brenda神經質，因為這種患「妄想被單打症」亦出現在「男人世界」的金融圈子內，小學雞式的疑似單打也不是不常見。
隨手拈來一例，金管局前總裁任志剛上星期接受雜誌訪問，老生常談講到喺香港，點都要有層樓揸手。雜誌星期六出街，兩日後，金管局現任總裁陳德霖咁啱就在專欄講下點樣調控樓市。又會咁啱嘅？今年2月「白頭任」以中大學者身份撰文建議廢除調控存款準備金率，翌日「攞命陳」就登一篇回顧離岸人民幣10周年文章。好喇喎，唔係又咁啱呀？
究竟是任志剛計好陳德霖出稿時間，所以先聲奪人，還是陳德霖見前上司發功，所以急急出文搶回曝光？相信只有他們兩人才知道。我不認識兩位金融高人，單從傳媒報道，任總巧妙地打造既高深又親民形象，他陪過港人打過金融大鱷，被格林斯潘讚過，說話有火，令人覺得有血有肉。相反陳德霖的低調沉實，在一般小市民眼中，就變得含糊陌生，看來要在形象工程下點功夫，否則難擺脫「被食住」的尷尬局面。
何淑茵
mailto:[email protected]