白宮前發言人卡尼（Jay Carney）上月離開華府，唞咗一排後，近日有傳蘋果公司想搵佢做公關要職。當時人就耍太極，冇證實單料堅定流，淨係話同好多人傾過各種可能嘅機會，一副「皇帝女唔憂嫁」咁款。除咗蘋果，聽聞現時人氣急升嘅call車服務公司Uber亦想佢加盟。
加盟蘋果單料係由卡尼嘅朋友放出，話蘋果想搵佢加盟，以填補全球公關部資深副總裁Katie Cotton退休後嘅空缺。雖然雙方已經傾過下，但由於卡尼仍心大心細，所以至今仍未達成協議。而卡尼回應傳媒查詢時就話無可奉告，只係透過電郵回覆話同好多人傾談各種可能的機會。
正所謂有麝自然香，現年49歲嘅卡尼於耶魯大學畢業後，曾做過《時代》雜誌記者，2011年起擔任白宮新聞發言人，老婆係美國ABC新聞資深記者，學歷、履歷同人脈都夠晒強，確係唔憂冇出路。