所有戰爭總有一個開戰嘅藉口，日本仔打中國，便借日本兵失蹤事件一手策劃七七盧溝橋事變。我越來越覺得「佔中」變成了北京向香港「開拖」借題發揮嘅藉口，乘機全面收緊對香港嘅控制。
自梁振英上台後，唔單止特區政府擺出一副戰鬥格，黨同伐異，擴大政治矛盾，加大社會對立氣氛，內地黨一套宣傳系統，亦主動向香港挑機。所謂「龍獅旗」、「港獨」，小小現象，早在十年前7.1遊行已存在，近兩年經內地黨媒煞有介事地「抬舉」評論一番後，立即成為似模似樣一股風潮。
「借題發揮」實乃內地自1949年以來歷次政治運動嘅手法，雖然1979年後鄧小平已否定急風暴雨式群眾運動，也否定文化大革命，但共產黨一套政治文化，並未有因此而有根本性轉變。共產黨當有政治需要時，便要找尋敵人、樹立敵人來作「借題發揮」對象。中共建政後十幾二十年政治鬥爭歷史，就是不斷找尋敵人，肅反鎮反，對付黑五類「地、富、反、壞、右」，然後搞鳴放反右對付反動知識分子，搞搞吓老毛認為敵人就在黨內，復辟資產階級、反革命分子就潛伏在黨內領導層，一樣係「借題發揮」，目的係要將大躍進失敗引發之信心危機轉移，趁機將劉少奇、鄧小平等有力威脅毛絕對權威嘅黨內領導鬥垮鬥臭，打在地下再蹅上一腳。
要鞏固黨領導權威，第一步係樹立內部敵人，第二步係拉高矛盾對立面。一分為二，人人歸邊，消滅中間溫和派空間，進入非友即敵二元對立狀態，鞏固政治支持基礎，敵愾同仇下，一切次要矛盾都先放下，最後目的係為了「搬龍門」，將真正矛盾轉移化解。
當爭取符合國際標準及一般常識嘅普選，被扣上了「港獨」、「勾結外國勢力」、「茉莉花革命」等帽子後，「13億人民當然絕對不能允許」，北京決定高門檻篩選的選舉模式，自然也是順應民意，維護國家利益為大前提，內地即使支持香港民主化的人，在國家統一大前提下，也不好「幫港出聲」了。
本來「真普選等如港獨」好順手，可以大大借題發揮抽乾水，內地人根本不會知道「港獨」在香港實際是甚麼一回事，𠵱家忽然又多了一個好藉口，就是「佔中」，將「佔中」扣上暴力破壞搞動亂帽子，再鼓動內地自由行一團又一團來簽名反「佔中」，表達13億人民不允許的意願，北京又再一次為了香港繁榮穩定，與廣大人民站在一起了。
當年劉少奇、鄧小平等人見大躍進後全國經濟崩潰，人民苦不堪言，於是容許農民有自留地，養幾隻雞，種種菜，但在老毛口中就因此變成了復辟資產階級，背叛社會主義。毛當然知道劉鄧不是背叛黨，毛不過是「借題發揮」而已！想不到幾十年後，內地呢一套政治手段又搬到來香港上演，正所謂「橋唔怕舊，最緊要受」，北京要為收緊對港政策建立一條群眾路線，一鋪過清除香港自1989年六四以來輻射入內地嘅「不良政治影響」，將港獨、佔中、普選炒埋一碟，一鋪打殘，可算係一條幾絕嘅橋。
添馬男