上周二，聯儲局主席耶倫在其發表的半年度貨幣政策報告中，罕有地談及股市，更特地指社交媒體及生化類板塊估值偏高，我諗唔少投資者都記得前主席格林斯潘曾經發表美股「非理性亢奮（irrational exuberance）」的評論，當時係1996年12月底，但他的言論並無遏止科技股升勢，升足幾年，到2000年科網泡沫方才爆破。
格老一句話被人詬病十幾年，堂堂聯儲局主席應該謹言慎行，前車可鑑，耶倫明知禁忌，亦甘於犯險，絕非無的放矢，科技股年初下跌，現再挑戰新高，唔多唔少都同耶倫貨幣政策有關，自己率先備案，既可減少責任上身，又可控制預期，這是正路拆局。但今次耶倫發言，我倒覺得係項莊舞劍。講真，美國科技龍頭股，估值的確唔低，但年初至今都只係上落市，要講泡沫似乎唔係時候；由於時間上的脗合，我覺得似為將於花旗國上市的阿里巴巴潑水降溫，雖然阿里不是該等股份，但指桑罵槐機會頗高。甚麼是合理估值，無人說得準，賣的人想將前景說得更美好，討個好價；買的人則要強調風險，亦是還價伎倆，雖然說聯儲局的營運目標沒有「保護投資者」一項，但若站在中國賣家和美國買家當中，耶倫要為哪一方說話，應該毋須多說吧？
大戶疑似壓住吸貨
美國出口術撲火，這邊廂港股看上去仍係半死不活，實則火頭處處，國退民進，將幾間乏善足陳的央企搞活，國藥（1099）直接改革，可以講唔衰得，因為後面陸續有來，此外，華潤系及中信泰富（267）出醜後，我相信紅籌省招牌行動即將實行，除華潤系仍被邊緣化外，其他各系蠢蠢欲動，粵海系、中糧系、越秀系、天津系各自各精采，筆者亦湊了不少熱鬧，大家見指數唔郁唔郁，我就覺得似有心人壓住入貨，畢竟唔夠貨點炒上去，滬港通咁大個招牌不容有失，所以近日大戶可能壓住大市，頻頻密吸。
自從美國退市有時間表，大家開始重睇估值，唔使講中港股估值夠晒平，所以見到外資不斷湧入，更多次觸及金管局的上限，雖然大家話錢無湧入股市，但我就點都唔信，我依然覺得錢係因為滬港通而來，遲啲更一定炒埋深港通，遲遲未上，只因手上未吸夠貨，貨唔夠就無籌碼向上炒，所以見近日中資概念股炒上，或者細價股炒上，但偏偏指數原地踏步，大家千祈唔好被指數愚弄。
其實股唔怕炒，但也要炒得其法，近日動向最主要係睇資金流，及板塊輪動，要全線炒起，唔夠貨未係時候，所以就要輪動，就好像先前叫炒的AH股，因為當時周遭缺乏概念，稍有瞄頭，大家就一注獨贏，但近日見到不同概念炒起，比較實在，而AH股只係靠心口一個勇字，所以我在電台就叫大家把先前熱炒的AH差價股套利，唔應該在現階段放太多注碼，現在揸家就應揸紅籌或改革股，炒家就炒殼。當然，觀成交表現，未成氣候，但只要有心人入夠貨，三兩個消息就可以引人入股，到時千川百水滙香江，點都要炒一炒，但近年散戶參與度始終偏低，炒埋都唔夠一碟，最後點散貨，下期話你知！
張士佳
註：筆者持有國藥（1099）及中信泰富（267）。