任志剛噚日下午出席自己新書簽名兼答問活動，佢一上台就以「我係退休五年嘅任志剛」去介紹自己，雖然話退休咁多年，應該人走茶涼，但係噚日活動反而見到佢仍然好有叫座力，現場500個位座無虛席，加埋企位，全場超過600人。大部份人聽完任總答問就乖乖排隊攞簽名，任總足足簽咗40分鐘先走得。
噚日活動下晝兩點開始，開波前15分鐘，現場起碼有三分一座位已經有人坐咗，之後陸續有好多人入場。
咪以為任總成日講聯繫滙率、人民幣發展呢類財經課題，就只得男士捧場，佢都有一大班唔同年齡層嘅女粉絲。
排隊搵任總簽名嘅粉絲應該有過百人，佢哋畀本書任總簽完名，仲例牌要影番張相集郵，成個簽名過程搞足40分鐘，可見任總魅力非凡，佢老友唐英年叫佢出嚟選特首都唔係冇原因㗎喎。