任總喺自己新書入面指自己曾經充斥一份傲氣，其實呢位金融沙王都有柔情與鬼馬嘅一面。佢被問到工作多年有乜「刻骨銘心」嘅事，佢竟然想也不想，望住台下太太葉小慧就話「最刻骨銘心，當然係太太啦」，差在未講多一句我愛你，已經令太太冧到不得了，仲博得全場掌聲。
忽然冧完太太之後，任總都有講番正經事，指多年工作確實有一件難忘事。佢指，當年金管局作為監管機構，但貨幣供應同埋定價權就喺滙豐銀行手上，令金管局難以實施貨幣政策。
任總隨後游說香港政府部門同埋行政會議，又因當時係殖民地所以要游說英倫銀行，仲要為確認1997回歸後市場暢順運作，佢亦要跟內地相關部門去傾。佢話三地游說工夫「得我一個人做咋」，最終1988年成功由滙豐手上攞返貨幣供應權，呢件事都算係刻骨銘心。