正所謂「窮在市區無人問、富在深山有遠親」，目前樓價重新谷起，市區公屋都要300萬元，200萬元或樓下新界私樓就快絕迹，即使在新界找一處廉價安樂窩都相當困難，不禁問政府，「你究竟可以做到乜！」
樓價連番破頂，已令到個別小市民心淡，上車無望，若果冇首期，基本打定輸數，注定做冇樓一族；有首期者也不知手執百零萬可以買到乜，眼見一間又一間迷你劏房最低消費都要數百萬元，睇住樓價一直有升冇跌，都咪話唔驚。
香港地少人多，反正租樓要幫業主供樓，好多小夫妻公一份婆一份，半世為層樓打工，當然有能力上車的應該值得恭喜，不過節衣縮食為層樓，還要為子女未來着想，供書教學，若果培育一個細路仔要400萬元，供20年，隨時等同供多一層樓，難怪時下年輕人傾向二人世界、養狗仔多過養人仔，老樓心諗，本港勞動人口可能青黃不接，20年後有工冇人（後生仔）做。
隨着勞動年齡老化，連同強積金未能退休安老，退休年齡延後，目前普遍一個300方呎單位都要300萬元或以上，市區豪宅地段更動輒千萬元，即使月入2萬至3萬元的中產人士遑論可以置業安居，加上超出申請公屋資格，這批中產人士變成無樓一族，那麼如何有落葉歸根的想法。
以前「老婆仔、車仔、屋仔和人仔」四仔主義為目標，現代人似乎追求「一仔」都相當困難。
劉兆昌
資深地產傳媒人
http://www.HKLau.com