路過書展，我肯肯定：我出書的話，不能在眾多作品中脫穎而出。就是星期日專欄，銷量（click rate）都認真一般，沒有美女、名車、美食，注定失敗。我在會展的cafè叫了一杯latte，坐在孤獨的一角低頭沉思：這個星期該寫甚麼？我只知道，不應該寫政改諮詢報告。我正在思索，甚麼題材可以呃多些like？那個題材可以吸引大家share？
或者，我應該索性轉一個更響亮的筆名，叫「李嘉誠」，逢星期日寫一個「李嘉誠的一百個成功口訣」，可以寫足一百日，專欄爆紅無誤。發錢寒的香港人諗都唔諗就會share。無人會知道真假，更無人過問真假，沒有記者會在長實業績發佈會舉手問這種蠢問題吧？不過，要威勿忘戴頭盔，萬一李生興師問罪，我又擔當不起……好，我再修改一下筆名，叫「李嘉誠個司機」，應該都可以呃到十萬八萬個like。
正所謂天生我才必有用，以我中學高考的中國文學修為，必須要改一個更有詩意的筆名──「李白」。在下將每星期作一藏頭詩，下測球賽主客和，上測六合彩攪珠。如今先作一首，請諸君品評：
二子今誰躡後塵
零零夜雨漬愁根
一暑一寒久自堅
八詠聲名躡後塵
中銓覆擬下慈宸
國門之西八九鎮
奪得天機動用權
冠劍堂堂兩大臣
坦白講，這種低能藏頭詩，又名「全自動藏頭詩」，網上有「藏頭詩生成器」助你無痛老作。這樣呃稿費，似乎太陰騭，於是作罷。
而貴為影視業專材，在多媒體世代，發揮空間理應更大。與其用簡單筆名老作，不如aim high，來個多媒體老作。本着有圖有片有真相的現代哲學真理，將北韓新聞、北韓足球隊和巴西世界盃片段「炒埋一碟」，配以嘰哩咕嚕的韓文，再加兩個金正恩close up，立一個標題：「北韓電視台報道：金正恩大演帽子戲法，北韓奪大力神盃！」加以似是而非的中文評論，網絡相傳，不出三日，可望破百萬hit rate！「係咪真係有人share？」會，share冇成本，網民唔會諗！「會唔會冇晒公信力？」公信力？乜嚟㗎？「怕唔怕俾人追究？」又唔似電視記者要親自出鏡，就算俾人踢爆，又有乜後果？我睇唔到囉。
寫到呢度，我發現我僅存的良知，都唔容許我如此老作。我認我冇用，我都係寫大家最關心，又最廉價的話題：黃之鋒DSE考幾多分。關我乜事？我都唔知。我只知道香港人喜歡鬧交：「你睇吓，搞咩學運？考成咁愧對父母！」「丘吉爾考試都肥佬！」「阿仔記住唔好學佢！」「你班五毛同我收聲！」
花生炒得正香，同意就like，唔同意就share，網絡多好。
Profile：柳俊江
前新聞記者、主播，動物NGO工作者。現為自由傳媒人兼「另類生態學家」，透視傳媒生態、動物生態、社會生態。《反智動物》討論最高智商靈長類動物之種種反智行為。[email protected]
