上屆足總盃冠軍東方足球隊，噚日聯同東方籃球隊職球員齊齊「出擊」，不過就唔係踢波或者打籃球，而係聯同民社服務中心，加埋北河燒臘飯店老闆明哥，拉隊到深水埗向區內露宿者派發愛心飯盒，之後又到南昌邨同富昌邨，送飯、飯券同福米畀幾百位長者。
東方足球隊重返甲組之後，已經參與過唔少回饋社會嘅活動，佢哋噚日由會長之一黎同光親自帶足、籃兩隊派愛心飯盒，收到飯盒嘅露宿者同長者當然開心；副總監歐偉倫就話，有機會同其他機構合作好開心，希望日後可以去探訪孤兒，到時自己就可以教佢哋踢波。
阿倫又透露，距離首場聯賽對傑志仲有個幾兩個月，開操頭一個月都唔會點谷球員體能，下月初仲會拉隊到台灣放幾日假，之後就去馬來西亞集訓同踢熱身賽，希望試出最理想陣容。另外，足總早前已經抽籤定咗首屆港超聯賽程，東方首仗硬撼傑志後，之後仲會鬥南華；由於戲碼好強，東方高層已計劃向足總提出，希望將呢兩場波搬到旺角場同大球場上演，畀多啲球迷入場支持。