有人話，馬照跑，舞照跳。但喺呢一刻，要同馬迷們宣佈一個唔知係好定壞消息，好消息係，嚟緊9月新賽季馬照跑，亦都照直播，壞消息係，2015年9月馬季可能要畀錢睇...唔係吖嘛？！睇賽馬直播都要畀錢？世界盃經已唔係場場有得免費睇，o依家連平時嘅大眾娛樂，都要畀錢先睇得？
其實早於去年底已有傳，政府發多兩個免費電視牌益「自己友」，同時有攞到牌嘅機構已經入紙馬會，申請賽馬轉播權。不過最快最快都要等到馬會同兩間電視台簽訂嘅轉播合約、即2014/15馬季完結、到期喇，先有得傾。有指馬會都唔想俾亞視繼續播，而且亦擔心亞視續唔到牌，故想斟其他台去播。有線收費台播開賽馬，now都有播，故曾傳如果now申請嘅話，中標機會都好高。
不過呢，最新消息就係話，有傳聞指now會同大台聯手，播2015年季度嘅賽馬直播，昨日更有雜誌報道指，馬會已經為無綫準備咗直播室，方便佢哋籌備。余詠珊直認同馬會落實作2015年9月賽馬直播，仲話：「初步打算會在無綫收費台播出，至於點做，要待開會再決定。」據知呢條收費頻道，就係之前無綫播世界盃開嘅頻道。
至於亞視執行董事葉家寶就指，續牌要到今年11月先有結果，亞視亦向馬會申請直播權，要待馬會回覆。
賽馬直播一直都係亞視嘅皇牌節目，但其實早於1997至2001年亞視都曾經試過失去賽馬直播權，而被無綫奪得。會否歷史重演，好快就知。
嗱，今年9月呢，大家都仲可以喺亞視免費睇嘅，下年9月喇喎，就唔知喇。