效力西甲巴塞隆拿嘅美斯，近年經常喺比賽期間嘔，球迷都好擔心佢嘅身體。不過除咗健康情況，美斯更唔開心係荷包都要嘔番凸，事關美斯要向西班牙稅務局補交稅兼罰款，竟然比佢今年嘅總收入更多，睇嚟新一季美斯要拍多啲廣告補番筆數。
成西班牙交稅王
美斯貴為全球數一數二嘅足球明星，收入自然豬籠入水，據美國《福布斯》雜誌估計，美斯喺14年全球運動員收入榜排第4，僅次於拳王美韋達、皇馬宿敵C朗同NBA球星勒邦占士，今年人工加埋廣告贊助就有4,800萬歐元（約5億港元），香港好多上市公司都冇咁好盈利。
但風光背後，美斯近年俾西班牙稅局追收番之前嘅逃稅，幾乎要拉要鎖咁大鑊，好彩錢解決到嘅就唔係問題，今年佢已經陸續向西班牙補交番5,300萬歐元嘅稅款（見附表），一躍成為西班牙交稅王；另外佢仲要交多300萬歐元嘅罰款，大嗱嗱要畀成5,600萬歐元，今年搵埋都唔夠填番筆數。
雖然有啲肉赤，但能夠避免牢獄之災，美斯都叫還得神落。而且佢只不過27歲，仲有大把世界，加上挾世界盃亞軍之勢，廣告代言應該有增無減，勤力啲幫巴塞贏多幾個盃，就咩錢都返晒嚟啦。
