【拆局】
特首梁振英昨日主動公佈與負責港澳事務的人大委員長張德江見面及匯報政改，政府又放風稱願意安排泛民與京官見面，有泛民指事不尋常，相信是梁振英在張德江的指示下，釋出開展談判的訊息，不排除周一林鄭月娥到立法會再談政改時，會有進一步消息。但泛民未敢過份樂觀，甚至擔心是中央部署打佔中的策略。
泛民人士分析，特首梁振英到深圳面見領導人並不罕見，「曾蔭權年代成日有、梁振英亦有見過」，但是通常並不公開。
今次梁公佈與張德江在深圳見面，必定獲張的同意，「甚至可能係張德江要佢（梁振英）返嚟香港公開講見過佢」，目的就是要梁開始為中央與泛民溝通做工夫，「話畀泛民知今次（溝通）有中央支持」。
林鄭或將釋出更多訊息
林鄭月娥明日將到立會政制事務委員會進一步交代政改，或會就泛民與中央開展談判釋出更多訊息，有泛民稱，「所以梁振英出嚟講咗先，好向中央交代之餘，亦令自己有番些少角色」。但是泛民未敢對談判過份樂觀，甚至不排除是中央打佔中的策略，「先同你傾，但企硬唔讓步，到傾唔掂打（佔中）就名正言順」。
《蘋果》記者