此日遇到餐廳R，順口問佢世界盃有冇帶來好生意，佢O晒嘴咁話：「兩個字，慘淡。分組賽時，我樂觀得滯，唔記得有免費轉播旗下酒吧通宵營業，等早上四點開波（巴西對克羅地亞），結果銅鑼灣店有一個客人，尖沙嘴酒吧有四人，蘭桂坊有六人。睇見唔對路，酒吧之後就喺一點打烊，咪搞我。晚飯又唔掂噃，好多熟客話返屋企食飯，提早上床，三點幾起身睇波，所以唔夜蒲咯，人地生意唔知做成點，我啲酒吧就在世界盃期間投晒降！」
如此生意，可云慘矣，如果捱得到2018，寄望俄羅斯世界盃在香港晚上黃金時間開賽，生意就會興旺啦，餐廳R就同時希望店舖租金下降，因為自由行豪客明顯減少，零售業正經歷一段負增長期，應該冇人搶貴晒啲租金嘅，順帶佢啲餐廳租金有望可以回軟喎！
趁此淡季兼暑假，不少老友紛紛外遊。馬主P與太太及子女出外放暑假之前，請馬主T夫婦，練馬師D與紐西蘭練馬師G等到佢府上吃一頓便飯，交談養馬、育馬、練馬之道。左丁山第一次到佢府上，坐在千幾平方呎（肉眼所見實用面積）嘅客廳，行出去有幾百呎大嘅露台遙望淺水灣、深水灣，輕嘆一聲，此之謂豪宅也。時下報紙時時誇大話邊度邊度有豪宅新盤，其實不少所謂豪宅嘅單位嘅實用面積只不過係一千至一千二百呎，細過馬主P嘅客廳，豪乜鬼吖。此獨立屋位於山坡，樓高四層，底層一樓係飯廳，二樓係客廳，三四樓係睡房與書房等等，唔怪得P太話：「我有時都唔知仔女去咗邊，一家四口在屋內用WhatsApp溝通。」
馬主P十分客氣，話普通晚飯，由菲傭下廚，請大家不可期望過高。點知餸菜上枱之後，就知道佢嘅菲傭直情有家廚水準，令人驚奇，原來係馬主P外母大人調教之功！跟住馬主P拿出紅酒奉客，第一瓶係2008法國酒，馬主T一試就讚好，第二瓶呢，眾人皆曰香醇透頂，原來係1982武當紅，好快飲完，就拿上一瓶1962 Latour，拜拜之前，馬主P話：「唔好嘥，乾杯！」我地當然一飲而盡。練馬師D與左丁山早知飲酒不能駕車，飯後一齊與練馬師G坐的士離開，馬主T夫婦當然有司機揸車回家。練馬師在的士上對左丁山講：「早知馬主P好人好客，故此為咗呢餐飯，我特別拖延一晚先至返祖家放假！」咁應該識做啦，下季賽馬令P夫婦贏多兩場頭馬都好啩！