英超球星薪高糧準，係好多人夢寐以求嘅工作，但如果財政管理不善，退休後晚境都好淒涼，好似打過「黑貓」新特蘭嘅前蘇格蘭國腳前鋒奇雲基爾（小圖），搵過1萬鎊（約13萬港元）周薪，但每星期用7,000鎊嚟賭，上季同蘇甲艾爾聯解約後，冇嘢做又冇積蓄，搞到要喺渡輪做400鎊周薪嘅搬運工人。其實奇雲基爾只係33歲，肯的起心肝練番波，球員生涯唔一定玩完。