上次玩完超磅，今次玩失眠！今日喺澳門威尼斯人「皇者之戰」惡鬥印尼拳手巴賈瓦、力爭職業拳賽14連勝嘅曹星如，希望繼續發揮佢嘅「神奇小子」威力，好似上次咁逢凶化吉、化失眠為力量，因為呢場勝負將會影響佢能否喺11月23日挑戰世界冠軍金腰帶！
唔敢吞果肉齋飲汁
「其實嚟澳門打拳賽，今次係第5次，對上4次賽前過磅都會失眠，噚晚成晚起幾次身，每逢凌晨2點、4點同6點都會自己彈起。因為要做磅，冇食嘢冇飲水，連續30個鐘，缺水情況好嚴重，有時會覺得肌肉痠痛，加上肚餓，所以冇覺好瞓。」星如話再早一晚都有少少失眠，但噚晚仲厲害，全靠一個蘋果救咗自己，「噚晚瞓唔着，一起身我就用水濕濕口，每次5至10分鐘；直到凌晨4點，呢次起身後，感覺特別肚餓同口渴。好彩房裏面有個蘋果，於是我咬咗一啖，不過就唔敢將蘋果肉吞落肚，只係靠少少蘋果汁頂住肚餓。全靠個蘋果救咗我，跟住可以瞓番，狀態已經好唔錯，以後或者都要帶定蘋果比賽。」噚日過完磅，星如即刻返房瞓覺，唞夠後到夜晚先去擦餐飽。
有信心挫印尼對手
禮拜二啱啱過咗27歲生日嘅星如，今日就會同印尼代表巴賈瓦打6個回合嘅最輕量級賽事。由於星如之前打開115磅，今次轉打118磅，所以減磅唔算好辛苦，亦唔擔心會好似上次過磅咁超重，反而佢話最唔及對手嘅係個髮型：「係囉，見到佢個髮型，都覺得自己今次平凡咗。講真，我喺網上根本搵唔到佢嘅比賽片段，但對我影響唔算大。我唔想估幾多回合可以贏對手，但針對上次唔夠集中嘅弱點，我最近將訓練嘅密度提高咗，所以好有信心。」本報記者徐嘉華澳門直擊
