「娜姐」李娜（圖）今年年初喺澳網先聲奪人，可惜無以為繼，喺法網同埋溫布頓都晨早畢業，又同教練卡洛斯「分手」。不過，佢終於有機會喺鄉里面前發威喇！因為據武漢網球公開賽嘅搞手表示，娜姐已經應承咗會參加嚟緊9月喺自己家鄉舉行嘅呢項WTA網賽。唔好以為呢個係雞仔賽，事關細威同舒拉寶娃等8位世界排名前10嘅女單球手已經應承參賽，可以話星光熠熠！