勞福局局長小肥張，以配偶名義買入東區一個未入伙單位，坐擁物業由八個新增至九個，榮登問責官員中的樓王。
這樣的新聞，本來沒什麼嚼勁，不過睇真些，小肥張無視梁先生的得意傑作雙辣招，持續入貨，買樓如集郵，也不怕別人詬病，團隊講一套做一套。張公不是工聯會臨記盲撐的「張融」，更非梁營骨幹如羅范之類，局長行走江湖久矣，醒覺良心呢家嘢，不但危險，而且言人人殊，是以搵夠就收籌，富貴「險」中（磚）頭！懶得配合你的N倍印花稅，樓市降溫這台戲，冇預我！
東區不是新界東北，新樓樓價堅挺，張太肯定有米過人。而毋須申報、立法會未完已經飛去巴西睇決賽的葉國謙，有相吹噓，比王利民走運，沒中假波飛的伏。王利民一行報世盃四強大戰，九天團費每位十一萬，淨波飛都要三萬。葉國謙那場德阿決戰炒賣價最高二萬美元。葉議員比上市公司主席富貴，間接省靚民建聯招牌。唔使帶埋菲傭信耶穌，幫黨出聲的待遇，有辦你睇。年青人啊，唔入大學就罷。佔中說白了不是影響前途而係斷送錢途，現場睇世界盃唔預你，驚未！