做冠軍拳手，賽前除咗節食做磅外，仲要忍受「有房歸不得」；講嘅係中國奧運冠軍拳王鄒市明，為咗專心減磅同備戰，就算有靚太冉瑩穎同大仔同行，都要分房瞓。
噚日過磅時問到市明，太太同個仔會唔會到場打氣，佢就爆出原來連日來都同佢哋分房瞓：「嚟咗澳門個幾禮拜都係分房瞓，就算佢哋喺隔籬房，我都好少過去，呢個禮拜大仔都係由太太一個人照顧。至於佢哋睇唔睇我比賽？我寧願佢哋唔好嚟，可以少啲牽掛。」
另外，雖然巿明簽咗美國經理人公司Top Rank後打咗幾場拳，但佢噚日接受外籍司儀訪問嗰陣，仲要中國經理人朋友幫手繙譯，英文似乎冇乜進展；對於今日首次打10回合，佢就話「既輕鬆又興奮」。巿明過磅後去咗同一間酒店舉行嘅另一個記者會，幫中國車手馬青驊打氣，後者公佈即將出戰10月同11月嘅WTCC世界房車錦標賽部份賽事，包括澳門大賽車。